‘అర్జున్ సురవరం’ ప్రతి ఒక్కరూ చూడదగ్గ సినిమా – ప్రీ-రిలీజ్ఈవెంట్లో మెగాస్టార్ చిరంజీవి

0
547

యంగ్ హీరో నిఖిల్, లావణ్య త్రిపాఠి జంటగా ప్ర‌ముఖ నిర్మాత ఠాగూర్ మ‌ధు స‌మ‌ర్ప‌ణ‌లో టి.సంతోష్ ద‌ర్శ‌క‌త్వంలో రాజ్‌కుమార్ అకెళ్ల నిర్మించిన లేటెస్ట్ యాక్ష‌న్ థ్రిల్ల‌ర్ `అర్జున్ సుర‌వ‌రం”. నవంబర్ 29న గ్రాండ్ గా విడుదలవుతున్న సందర్భంగా హైదరాబాద్ పీపుల్స్ ప్లాజాలో ఏర్పాటు చేసిన ప్రీ రిలీజ్ కార్యక్రమానికి మెగాస్టార్ చిరంజీవి ముఖ్య అతిధి హాజరయ్యి ‘అర్జున్ సురవరం’ బిగ్ టికెట్ ను ఆవిష్కరించారు. ఈ కార్యక్రమంలో తెలంగాణ మంత్రివర్యులు తలసాని శ్రీనివాసయాదవ్, నిర్మాతలు ఠాగూర్ మధు, రాజ్ కుమార్ అకెళ్ళ, దర్శకులు మారుతి, చందు మొండేటి, టి.సంతోష్‌ హీరో నిఖిల్, హీరోయిన్ లావణ్య త్రిపాఠి తదితరులు పాల్గొన్నారు. ఈ సందర్భంగా..

మెగాస్టార్ చిరంజీవి మాట్లాడుతూ – ‘‘ఈ ఫంక్షన్‌కి నేను రావడం చాలామందికి ఆశ్చర్యంగా ఉండొచ్చు. నేను బిజీగా ఉంటాను కాబట్టి నన్ను ఫంక్షన్‌కి రమ్మని ‘ఠాగూర్‌’ మధు ఇబ్బంది పెట్టరు. మరి ఎవరి ప్రభావంతో, ఎవరి ప్రమేయంతో వచ్చానన్నది చాలా మందికి అనుమానం ఉండొచ్చు.నిజం చెప్పాలంటే ఈ సినిమా ప్రీమియర్‌ షో చూసిన తర్వాత నేనే రావాలనుకున్నా. ఇలాంటి మంచి సినిమాని ప్రేక్షకుల్లోకి తీసుకెళ్లాలని వచ్చా. నిర్మాత రాజ్‌కుమార్‌ మరొక ప్రధానమైన కారణం. ఎక్కడైనా పైరసీ జరుగుతుంటే సైబర్‌ పోలీసుల్లా వెళ్లి తనకు ఉన్న సాంకేతిక పరిజ్ఞానంతో దాన్ని పూర్తీగా ధ్వంసం చేసి, ఇండస్ట్రీకి గొప్ప సహాయం చేస్తున్నాడు. తను సినిమా తీస్తున్నాడనే విషయం, తన వెనక ‘ఠాగూర్‌’ మధు ఉన్నాడనే విషయం నాకు తెలియదు. ఓ రోజు వచ్చి సినిమా తీశాననగానే ఆశ్చర్యంగా అనిపించింది.. ప్రివ్యూ చూశాక ఫంక్షన్‌కి పిలుస్తారేమో అనుకుంటే పిలవలేదు. నన్ను పిలవడానికి కూడా తనకి మొహమాటం. ఈ సినిమా గురించి ప్రజలకు చెప్పాలి, వాళ్ల దగ్గరకు తీసుకెళ్లాలంటే నన్ను ఉపయోగించుకోండి అన్నాను.. అయినా కూడా ఇబ్బంది పడ్డాడు (నవ్వుతూ). సంతోష్‌ తమిళ ఇండస్ట్రీ నుంచి వచ్చి తెలుగు సినిమా చేశాడు. కథ బాగుంటే భాషతో సంబంధం లేదు.. ఎవరైనా ఆదరిస్తారు. లవర్‌బాయ్‌గా ఉండే నిఖిల్‌ ఈ సినిమాతో యాక్షన్‌ హీరోగా మారాడనుకుంటున్నా. నిఖిల్‌ సినిమాలు గతంలో ఒకటి, రెండు చూశా. కానీ, కలిసే సందర్భం రాలేదు. ‘అర్జున్‌ సురవరం’ప్రీమియర్‌ షోలో నన్ను చూడగానే తను ఎగ్జైట్ అయిన విధానం చూస్తే నాకు మరో తమ్ముడు, శిష్యుడు దొరికాడని సంతోషం కలిగింది. ప్రేమించే మనుషులు దొరకడం బ్యాంక్‌ బ్యాలెన్స్‌గా భావిస్తా. నిఖిల్‌ వల్ల నా బ్యాంక్‌ బ్యాలెన్స్‌ మరింత పెరిగిందనుకుంటున్నా ప్రతి ఒక్కరూ చూడదగ్గ సినిమా ఇది. ఎందుకంటే కంటెంట్‌తో కనెక్ట్‌ అవుతారు. స్మార్ట్‌ ఫోన్స్‌ వాడుతున్న ప్రతి ఒక్కరూ జాగ్రత్తగా ఉండాలని చెప్పే చిత్రమిది. మరీ ముఖ్యంగా నిరుద్యోగ యువత చూడాలి. ఇప్పటి వరకూ ఏ ఫంక్షన్‌కైనా నన్ను పిలిస్తే వెళ్లాను. కానీ, ‘అర్జున్‌ సురవరం’ సినిమాకి ఫంక్షన్‌ పెట్టుకోండి, ముఖ్య అతిథిగా వస్తానని చెప్పి మరీ పెట్టించుకున్నా (నవ్వుతూ). లావణ్యా త్రిపాఠి నవ్వంటే నాకు ఇష్టం. ఆ సొట్ట బుగ్గలు భలే ఉంటాయి. ఇలాంటి మంచి సినిమాల ఫంక్షన్స్‌కి నేనున్నాను అంటూ ముందుకొచ్చే నా సోదరుడు తలసానిగారికి అభినందనలు. ఈ సినిమాలోని ‘చేగువేరా..’ పాట చూస్తున్నప్పుడు నా తమ్ముడు పవన్‌ కల్యాణ్‌ గుర్తొచ్చాడు’’ అన్నారు.

తెలంగాణ మంత్రి తలసాని శ్రీనివాస యాదవ్‌ మాట్లాడుతూ – ‘‘ఇదొక మంచి కథ. తప్పకుండా ప్రేక్షకులు మంచి చిత్రాన్ని ఆదరించి హిట్‌ చేయాలి. ‘బాహుబలి, సైరా నరసింహారెడ్డి’ లాంటి సినిమాలు ప్రపంచ స్థాయిలో తెలుగు సినిమా పరిశ్రమ సత్తా చాటాయి. చిరంజీవిగారు టీవీ సీరియల్స్, సినిమా ఫంక్షన్స్‌తో పాటు ఇలాంటి చిన్న సినిమాల వేడుకలకు రావడం చాలా సంతోషం. ఆయన రావడం వల్ల చిన్న సినిమాల స్టామినా పెరిగి జనాల్లో క్రేజ్‌ వస్తుంది.. అందుకే ఆయన ఇండస్ట్రీకి పెద్ద దిక్కు’’ అన్నారు.

చిత్ర నిర్మాత రాజ్‌కుమార్‌ అకెళ్ల మాట్లాడుతూ– ‘‘మెగా స్టార్ గారిని కలవడమే ఒక కల. అలాంటిది నేను ఓ సినిమా నిర్మించడం, ఆ ఫంక్షన్‌కి చిరంజీవిగారు రావడం అదృష్టంగా భావిస్తున్నాను. ఆయనకున్న కోట్లాది మంది అభిమానుల్లో నేను ఒకడిని. ఆయన ‘ఛాలెంజ్‌’ సినిమా స్ఫూర్తి నన్ను ఈ రోజు వరకూ ముందుకు నడిపిస్తోంది. చాలా సమస్యలను అధిగమించి ఈ సినిమాను రిలీజ్ చేస్తున్నాము. తప్పకుండా మీ అందరికి నచ్చుతుందని కోరుకుంటున్నాను’’ అన్నారు.

డైరెక్టర్ మారుతి మాట్లాడుతూ – ” నా దేవుడు చిరంజీవి గారి ముందు ఇక్కడ మాట్లాడడం హ్యాపీ గా ఉంది. నేను వచ్చింది ఆయన దగ్గరనుండే. రాజ్ కుమార్ గారు నాకు చాలా కాలంగా తెలుసు రాజ్ కుమార్ గారు, ఠాగూర్ మధు గారు కలిసి ఈ సినిమా నిర్మించడం చాలా సంతోషం. యూత్ కి కనెక్ట్ అయ్యే సబ్జెక్ట్ .తప్పకుండా ప్రతి ఒక్కరికి నచ్చుతుంది” అన్నారు.

హీరో నిఖిల్ మాట్లాడుతూ – ” అభిమానుల మధ్య కూర్చొని నేను కూడ సందడి చేయాలనుకున్నాను. ఇది నిజమో, కలా అర్థం కావడంలేదు. మాటలు రావడం లేదు. నాలుగు రోజుల నుంచి ఏం జరుగుతుందో తెలియడం లేదు. లెజెండ్ ఆఫ్ఇండియన్ సినిమా మెగస్టార్ చిరంజీవి గారు మా సినిమా ప్రీ-రిలీజ్ కు వస్తారంటే నమ్మలేకపోయాను. కానీ ఆయన వచ్చారు. సాక్షాత్తు సైరా నరసింహారెడ్డి, మా గ్యాంగ్ లీడర్, మా ముఠామేస్త్రీ మా మెగాస్టార్ట్ చిరంజీవి గారు వేదిక పై ఉన్నారు. ఒక సినిమా విడుదల చేయడం కష్టంగా ఉన్న ఈ రోజుల్లో ఇన్ని అడ్డంకులు వచ్చిన కానీ, మంచిసినిమా, ముందుకు వెళ్లాలి అని చిన్న ఆశతో ఉన్న మాకు దేవుడు రూపంలో మా మెగాస్టార్ చిరంజీవి…మా హీరో దేవుడిలా వచ్చిమీ సినిమా పబ్లిక్ లోకి వెళ్లాలి. ప్రేక్షకులు చూడాలి అని వచ్చారు. మా సినిమా షో మూడు గంటలకు అంటే ఐడునిమిషాలు ముందే వచ్చారు ఆయన, అది చూస్తుంటే మాలాంటి యువ హీరోలకు భయం వేస్తుంది. అదీ చూస్తుంటే ఎంత కష్టపడితే, అసలు మేం చేయగలుగుతామా? అనే డౌట్ కూడా ఉంది. చిరంజీవిగారికి థ్యాంక్స్, చిరంజీవి గారు మా సినిమా చూసి హగ్ ఇచ్చారు. ఆ రోజును ఎప్పటికి మర్చిపోలేను. మొన్నటి వరకు నేను చిరంజీవి గారి అభిమానిని. నేటి నుంచి ఆయన భక్తుడ్ని. ఈ చిత్రం ఎప్పటికీ నాకు గుర్తిండిపోతుంది. చాలా నిజాయితీగా తీశాం. మంచి సినిమా థియేటర్స్ లో చూడండి. అలాగే ఇక్కడికి వచ్చిన తలసానిగారికి ప్రత్యేక ధన్యవాదాలు” అన్నారు.

చిత్ర దర్శకుడు టి.సంతోష్‌ మాట్లాడుతూ – ‘‘ తెలుగులో నా తొలి చిత్రమిది. మమ్మల్ని సపోర్ట్‌ చేసేందుకు ఇక్కడికి వచ్చిన చిరంజీవిగారికి, ఆయన అభిమానులకు థ్యాంక్స్‌. చాలా మంది నన్ను అడిగారు అర్జున్ సురవరం అంటే ఏంటి? అని అర్జున్ అంటే క్లీన్. ఈ సినిమాలో అర్జున్ క్యారెక్టర్ క్లీన్, ప్యూర్ రిపోర్టర్. సురవరం అనేది సీనియర్ జర్నలిస్ట్ సురవరం ప్రతాప రెడ్డి గారి ఇన్స్పిరేషన్ తో తీసుకోవడం జరిగింది. అలాగే మా నిర్మాతలు మధు, రాజ్ కుమార్ గారికి థాంక్స్” అన్నారు.

హీరోయిన్ లావణ్యా త్రిపాఠి మాట్లాడుతూ ‘‘ఈ ఏడాది విడుదలవుతున్న నా మొదటి తెలుగు సినిమా ఇది.. రిలీజ్‌ కోసం ఎగ్జైటెడ్ గా ఉన్నా’’ అన్నారు న‌టీన‌టులు: నిఖిల్‌, లావ‌ణ్య త్రిపాఠి, వెన్నెల‌కిషోర్‌, పోసాని కృష్ణ‌ముర‌ళి, త‌రుణ్ అరోరా, నాగినీడు, స‌త్య‌, విద్యుల్లేఖా రామ‌న్ త‌దిత‌రులు
సాంకేతిక వ‌ర్గం:
ర‌చ‌న‌, ద‌ర్శ‌క‌త్వం: టి.సంతోష్‌
స‌మ‌ర్ప‌ణ‌: ఠాగూర్ మ‌ధు
నిర్మాత‌: రాజ్‌కుమార్ అకెళ్ల‌,
సంగీతం: సామ్ సి.ఎస్‌,
సినిమాటోగ్ర‌ఫీ: సూర్య‌,
ఎడిట‌ర్: న‌వీన్ నూలి.

LEAVE A REPLY

Please enter your comment!
Please enter your name here