ప్రముఖ నటి జరీనా వహాబ్ ప్రధాన పాత్రలో దీపక్ బల్‌దేవ్ ఠాకూర్ ‘తు బేఖబర్’
వెటరన్ నటి జరీనా వహాబ్ ప్రధాన పాత్రలో తెరకెక్కుతున్న సోషల్ డ్రామా చిత్రం ‘తు బేఖబర్’ షూటింగ్ పూర్తి చేసుకుని ప్రస్తుతం పోస్ట్ ప్రొడక్షన్ పనులు జరుపుకుంటోంది. భారతీయ సినీ రంగంలో తనదైన నటనతో గుర్తింపు తెచ్చుకున్న జరీనా వహాబ్, ఇటీవల ‘ది రాజా సాబ్’, ‘మన శంకర వరప్రసాద్ గారు’ చిత్రాల్లోనూ నటించారు. దీపక్ బల్‌దేవ్ ఠాకూర్ దర్శకత్వంలో రూపొందుతున్న ఈ చిత్రాన్ని “గ్లిట్టర్స్ ఫిల్మ్ అకాడమీ” బ్యానర్‌పై నిర్మిస్తున్నారు. డి. దినకర్ నాయుడు సహ నిర్మాత. సమకాలీన సామాజిక సమస్యలను స్పృశించే హృద్యమైన కథాంశంతో, ప్రస్తుత సమాజానికి అవసరమైన సందేశాన్ని అందించే చిత్రంగా ‘తు బేఖబర్’ను మేకర్స్ అభివర్ణిస్తున్నారు.
జరీనా వహాబ్‌తో పాటు మధు నంబియార్, పవన్ కుమార్, హేమ గుప్తా కీలక పాత్రల్లో నటిస్తున్నారు. జి.ఎల్. బాబు సినిమాటోగ్రఫీ అందిస్తుండగా, సంజీవ్ కుమార్ సంగీతం సమకూరుస్తున్నారు. షూటింగ్ పూర్తి చేసుకున్న ఈ చిత్రం త్వరలో ప్రముఖ ఓటీటీ వేదికపై ప్రత్యేక ప్రీమియర్‌గా ప్రేక్షకుల ముందుకు రానుంది. స్ట్రీమింగ్ తేదీతో పాటు అధికారిక టీజర్‌ను త్వరలో వెల్లడించనున్నట్లు చిత్ర బృందం తెలిపింది!!
