హైదరాబాద్ ఫిలిం స్టూడియో ప్రారంభం!!

0
537

నగరం నిద్రపోతున్నవేళ, శరణం గచ్చామి లాంటి సందేశాత్మక చిత్రాలకు దర్శకత్వం వహించిన ప్రేమ్ రాజ్ నేతృత్వంలో హైదరాబాద్ నడిబొడ్డున బాగ్ లింగంపల్లిలో “హైదరాబాద్ ఫిలిం స్టూడియో’ పేరుతో కొత్తగా ఒక మినీ సినీ స్టూడియో ఏర్పడింది. దీన్ని ప్రముఖ సినీ దర్శకులు ఎన్.శంకర్, బి.నర్సింగరావు, సీఎం. ఓ.ఎస్.డి. దేశపతి శ్రీనివాస్ కలిసి ప్రారంభించారు.

ఈ సందర్బంగా బి.నర్సింగరావు మాట్లాడుతూ “హైదరాబాద్ పేరుతో ఫిలిం స్టూడియో ప్రారంభించడం దక్కన్ సంస్కృతికి ప్రతిబింబమని, ముఖ్యంగా ఈ స్టూడియో చిన్న నిర్మాతలకు, సీరియల్స్, వెబ్ సిరీస్ నిర్మించేవారికి ఎంతో ఉపయోగపడుతుంది’ అని అన్నారు.

ప్రముఖ దర్శకులు ఎన్.శంకర్ మాట్లాడుతూ “ప్రేమ్ రాజ్ వ్యక్తిగతంగా తనకు సోదరుడిలాంటివాడని, అతను సినిమా ఇండస్ట్రీలోకి వచ్చినప్పటినుండి చాలాదగ్గరగా పరిశీలిస్తున్నానని, ఏదైనా సాధించాలనుకుంటే అది చేసేదాకా నిద్రపోని మనస్తత్వం ప్రేమ్ రాజ్ ది అని అన్నారు. ప్రేమ్ రాజ్ లాంటి సున్నిత మనస్కుడు వ్యాపారం చేయగలడా అని అనుకున్నానని కానీ ఈరోజు చెప్పింది చేసి చూపించాడని, నగరం మధ్యలో అందరికీ అందుబాటులో ఉన్న ఈ స్టూడియో తొందర్లోనే షూటింగ్
లతో అలరారుతుందని భావిస్తున్నానని అన్నారు.

దేశపతి శ్రీనివాస్ మాట్లాడుతూ
“ప్రేమ్ రాజ్ నాకు చిరకాల మిత్రుడు. తెలంగాణ ఉద్యమంలో ఇద్దరం కలిసి పని చేసాం. ఆ స్నేహం ఇప్పటికీ కొనసాగుతుంది’ అన్నారు. అయితే వ్యాపారం కళ రెండు వేరు వేరు దారులని, సహజంగా రచయిత దర్శకుడైన ప్రేమ్ రాజ్ ఇప్పుడు వ్యాపారవేత్తగా ఆలోచించి జాగ్రత్తగా అడుగులు వేయాలన్నారు. తన మిత్రుడు ఈ వ్యాపారంలో రాణిస్తే తనకన్నా ఆనందించేవారుండరని అందుకోసం ఎలాంటి సహకారమైనా అందిస్తానని దేశపతి పేర్కొన్నారు.

నవ తెలంగాణ పత్రిక సంపాదకులు ఎస్.వీరయ్య మాట్లాడుతూ “సినిమా రంగం చాలా ప్రాధాన్యత గల మాధ్యమం. ఇది ప్రజల మీద చూపించే ప్రభావం అపారం. అది గమనించి దర్శక నిర్మాతలు ప్రజలకు ఉపయోగపడే రీతిగా చిత్రాలు రూపొందించాల్సిన అవసరం ఉంది. ఈ స్టూడియో ఆ దిశగా చిత్రాలు నిర్మించేవారికి తోడ్పడుతుందని భావిస్తున్నాను’ అన్నారు.

ప్రజా గాయని విమలక్క మాట్లాడుతూ…
“ప్రేమ్ రాజ్ ను నేను స్వంత తమ్ముడిలా భావిస్తాను.నేను ఇబ్బందుల్లో ఉన్నప్పుడు తనంత తానుగా వచ్చి ఓదార్చిన మంచి మనసున్న మనిషి ప్రేమ్ రాజ్. ఈ స్టూడియో ఔత్సాహిక కళాకారులందరికీ వేదికగా
మారాలని కోరుకుంటున్నాను అని విమలక్క చెప్పారు.

స్టూడియో అధినేత ప్రేమ్ రాజ్ మాట్లాడుతూ“ఒక దర్శకుడిగా నాకు నిర్మాతల కష్టాలు తెలుసు గనుక అన్ని సౌకర్యాలతో అందరికీ అందుబాటులో ఉండే విధంగా స్టూడియోను తీర్చిదిద్దినట్టు చెప్పారు. స్టూడియో ప్రారంభించేనాటికే ఎంతోమంది నిర్మాతలు తమ సీరియల్స్ సినిమాలకోసం స్టూడియోను బుక్ చేసుకోవటం చూస్తే తన లక్ష్యం నెరవేరినట్లు అనిపిస్తోందని’అన్నారు. ఇంకా ఈ కార్యక్రమంలో స్టూడియో భాగస్వాములు వింజమూరి మధు, అరుణకుమార్, దర్శకులు చంద్రమహేష్, భరత్ పారేపల్లి, తుమ్మలపల్లి రామసత్యనారాయణ, వడ్లపట్ల మోహన్, నటుడు ఇంద్రనీల్, ఆరూరి సుధాకర్, మహేష్ బొల్లారం, జిలుకర శ్రీనివాస్, పసునూరి రవీందర్, నలిగంటి శరత్, పి.ఎన్.మూర్తి, బాలలక్ష్మి తదితరులు పాల్గొన్నారు!!

LEAVE A REPLY

Please enter your comment!
Please enter your name here