నకిలీ, బిచ్చగాడు, బేతాళుడు వంటి డిఫరెంట్‌ మూవీస్‌తో తెలుగు ప్రేక్షకులకు బాగా దగ్గరైన హీరో విజయ్‌ ఆంటోని. లేటెస్ట్‌గా ‘యమన్‌’గా మరోసారి అందర్నీ ఎంటర్‌టైన్‌ చేసేందుకు సిద్ధమయ్యారు. మిర్యాల సత్యనారాయణరెడ్డి సమర్పణలో ద్వారకా క్రియేషన్స్‌, లైకా ప్రొడక్షన్స్‌ పతాకాలపై జీవశంకర్‌ దర్శకత్వంలో రూపొందిన ఈ చిత్రాన్ని నిర్మాత మిర్యాల రవీందర్‌రెడ్డి తెలుగులో అందిస్తున్నారు. మహా శివరాత్రి కానుకగా ఫిబ్రవరి 24న ఈ చిత్రం విడుదల కాబోతోంది. ఈ సందర్భంగా హీరో, మ్యూజిక్‌ డైరెక్టర్‌ విజయ్‌ ఆంటోనితో ఇంటర్వ్యూ..
ఇప్పటివరకు మీరు చేసిన సినిమాలకు భిన్నమైన సినిమాగా వస్తున్న ‘యమన్‌’ ఎలా వుండబోతోంది?
– ఇది ఒక పొలిటికల్‌ థ్రిల్లర్‌. ప్రజెంట్‌గా జరుగుతున్న రాజకీయ పరిణామాలకు, ఈసినిమాకి ఎలాంటి సంబంధం లేదు. మన పొలిటీషియన్స్‌ ఎలా వుంటారో మనకు తెలుసు. వారిని దృష్టిలో వుంచుకొని ఈ సినిమా చేశాం. ఒక సాధారణ వ్యక్తి మినిస్టర్‌ ఎలా అయ్యాడు అనేది ప్రధాన ఇతివృత్తం.
ప్రస్తుతం తమిళనాడులో రాజకీయంగా ఎన్నో మార్పులు జరుగుతున్నాయి. ఈ సినిమాలో వాటిని తలపించే సీన్స్‌ ఏమైనా వున్నాయా?
– ప్రజెంట్‌గా తమిళనాడులోని పాలిటిక్స్‌కి, ఈ సినిమాకి ఎలాంటి సంబంధం లేదు. ఐదు సంవత్సరాల క్రితమే రాసిన కథ ఇది. పాలిటిక్స్‌ ఎక్కడైనా ఒక్కటే. వ్యక్తులు మాత్రమే మారతారు తప్ప వాళ్ళు చేసే పనులన్నీ ఒకలాగే వుంటాయి. కాబట్టి ఈ కథ అన్ని ప్రాంతాలవారికి నచ్చుతుంది.
‘యమన్‌’ అని టైటిల్‌ పెట్టడానికి రీజన్‌?
– దుష్ట శక్తుల పాలిట ఇందులో హీరో యముడులా వుంటాడు. కాబట్టి ‘యమన్‌’ అనే టైటిల్‌ పెట్టాం. యమన్‌ అనేది శివుడి అవతారం, ధర్మాన్ని కాపాడేవాడు యముడు.
నిర్మాత రవీందర్‌రెడ్డి గురించి?
– చాలా నైస్‌ ప్రొడ్యూసర్‌. సినిమాని చాలా గ్రాండ్‌గా ప్రమోట్‌ చేస్తున్నారు. సినిమా అందరికీ రీచ్‌ అయ్యేలా రాత్రి, పగలు కష్టపడి పనిచేస్తున్నారు.
‘యమన్‌’ మీకు ఎలాంటి సినిమా అవుతుందనుకుంటున్నారు?
– అన్ని సినిమాలూ సూపర్‌హిట్‌ కావాలని కోరుకోవడం కరెక్ట్‌ కాదు. ప్రతి సినిమా నకిలీ కాదు, బిచ్చగాడు కాదు. ఆయా సినిమా స్క్రిప్ట్‌కి తగ్గట్టుగానే ఆడియన్స్‌ని రీచ్‌ అవుతుంది. అలాగే ‘యమన్‌’ ఓ డిఫరెంట్‌ సబ్జెక్ట్‌. ఇది అన్ని వర్గాల ప్రేక్షకులకు నచ్చే సినిమా అవుతుంది. డెఫినెట్‌గా నాకు మంచి పేరు తెస్తుంది.
నెక్స్‌ట్‌ ప్రాజెక్ట్స్‌?
– తెలుగు, తమిళ భాషల్లో ఒక సినిమా చేస్తున్నాను. ఈ రెండు వెర్షన్స్‌కి వేర్వేరు టెక్నీషియన్స్‌ పనిచేస్తారు. తెలుగు వెర్షన్‌కి తెలుగు వారికే అవకాశం ఇస్తున్నాం. తమిళ్‌ వెర్షన్‌కి తమిళ్‌వారే వర్క్‌ చేస్తారు అంటూ ఇంటర్వ్యూ ముగించారు విజయ్‌ అంటోనీ.
