చిన్న సినిమాలను తొక్కేస్తున్న ఫిల్మ్ ఛాంబర్‌ – షిరాజ్ మెహదీ తీవ్ర ఆగ్రహం

0
4
Shiraz Mehdi Launches Scathing Attack To Support Small Films
Shiraz Mehdi Launches Scathing Attack To Support Small Films

చిన్న సినిమాలను తొక్కేస్తున్న ఫిల్మ్ ఛాంబర్‌ – షిరాజ్ మెహదీ తీవ్ర ఆగ్రహం

▪️ ‘నా బ్యానర్‌నే తిరస్కరిస్తారా.. చూస్తూ ఊరుకోను’
▪️ చిన్న సినిమాలను చంపేస్తున్నారు
▪️ ఓటీటీ, శాటిలైట్‌, థియేటర్లలోనూ వివక్షే
▪️ సీఎం రేవంత్‌రెడ్డి వరకు ఈ వ్యవహారాన్ని తీసుకెళ్తా
▪️ అవసరమైతే వంద ప్రెస్‌మీట్లు, వంద ర్యాలీలు, ధర్నాలకైనా సిద్ధం

హైదరాబాద్‌: తెలుగు చిత్ర పరిశ్రమలో చిన్న బడ్జెట్‌ సినిమాల మనుగడ ప్రశ్నార్థకంగా మారుతోందని, కొందరి ఆధిపత్యం, ఫిల్మ్‌ ఛాంబర్‌ నిర్ణయాల కారణంగా కొత్త నిర్మాతలు, దర్శకులు తీవ్ర ఇబ్బందులు ఎదుర్కొంటున్నారని ‘ఓ అందాల రాక్షసీ’ చిత్ర హీరో, దర్శకుడు షిరాజ్‌ మెహదీ తీవ్రస్థాయిలో ధ్వజమెత్తారు. తన సినిమాకు థియేటర్లు కేటాయించాలంటూ ఏడాది కాలంగా పోరాటం చేస్తున్నప్పటికీ సమస్య పరిష్కారం కాకపోగా, తాజాగా తన నిర్మాణ సంస్థ బ్యానర్‌ రిజిస్ట్రేషన్‌ను కూడా తిరస్కరించడంపై ఆయన తీవ్ర ఆగ్రహం వ్యక్తం చేశారు. ఈ వ్యవహారం కేవలం తన ఒక్క సినిమా సమస్య కాదని, యావత్‌ చిన్న సినిమా నిర్మాతల భవిష్యత్తుకు సంబంధించిన అంశమని స్పష్టం చేశారు. ప్రెస్‌మీట్‌లో ఆయన ఫిల్మ్‌ ఛాంబర్‌ పనితీరు, థియేటర్ల కేటాయింపు, ఓటీటీ వ్యాపారం, పంపిణీ వ్యవస్థ, పరిశ్రమలోని ఆధిపత్య ధోరణులు, తెలంగాణ ప్రభుత్వ జోక్యం తదితర అంశాలపై సంచలన వ్యాఖ్యలు చేశారు.

బ్యానర్‌ తిరస్కరణతో మరింత తీవ్రతరం
తన సినిమాకు థియేటర్లు కేటాయించాలంటూ పలుమార్లు ప్రెస్‌మీట్లు, ఇంటర్వ్యూలు నిర్వహించి సమస్యను ప్రజల దృష్టికి తీసుకొచ్చానని షిరాజ్‌ తెలిపారు. ఈ క్రమంలో తన నిర్మాణ సంస్థ బ్యానర్‌ రిజిస్ట్రేషన్‌ను ఛాంబర్‌ తిరస్కరించడం మరింత ఆగ్రహానికి గురిచేసిందన్నారు. తాను నిర్వహిస్తున్న ప్రెస్‌మీట్లు, చేస్తున్న వీడియోలు నచ్చకపోవడంతోనే బ్యానర్‌ను తిరస్కరించినట్లు తనకు కారణం చెప్పారని వెల్లడించారు. ఏదైనా అభ్యంతరం ఉంటే పిలిచి మాట్లాడాలి తప్ప, ఏకపక్షంగా నిర్ణయాలు తీసుకోవడం ఏమిటని ప్రశ్నించారు. ఇది వృత్తిపరమైన వ్యవహారశైలి కాదని, గుండాయిజం, రౌడీయిజాన్ని తలపిస్తోందని మండిపడ్డారు. తన బ్యానర్‌ను తిరస్కరించినవారే భవిష్యత్తులో సన్మానం చేసి బ్యానర్‌ అందించే పరిస్థితి వస్తుందని వ్యాఖ్యానించారు. తన పోరాటాన్ని తక్కువగా అంచనా వేయవద్దని, ఇకపై తన స్పందన ఎలా ఉంటుందో వేచి చూడాలని హెచ్చరించారు.

తెలంగాణలో ఆంధ్రా పెత్తనమా?
హైదరాబాద్‌ తెలంగాణలో ఉన్నప్పటికీ, ఇక్కడి చిత్ర పరిశ్రమ వ్యవహారాల్లో ఆంధ్రప్రదేశ్‌ ఫిల్మ్‌ ఛాంబర్‌ ఆధిపత్యం కొనసాగుతోందని షిరాజ్‌ ఆరోపించారు. తెలంగాణ ఫిల్మ్‌ ఛాంబర్‌కు కీలక నిర్ణయాలు తీసుకునే స్థాయిలో అధికారాలు లేవని, తెలుగు ఫిల్మ్‌ ఛాంబర్‌ చేతుల్లోనే ప్రధాన వ్యవహారాలు ఉన్నాయని పేర్కొన్నారు. తెలంగాణ ప్రాంతానికి చెందిన చిన్న నిర్మాతలు, దర్శకులు, కళాకారులను తొక్కేయాలని చూస్తే ఇకపై సహించేది లేదన్నారు. ఆంధ్రప్రదేశ్‌ నుంచి వచ్చిన సినీ ప్రముఖులు, నిర్మాతలు, కళాకారులకు తెలంగాణ ఎప్పుడూ స్వాగతం పలుకుతుందని, అందరూ అన్నదమ్ముల్లా కలిసిమెలిసి ఉండాలని కోరుకుంటుందని చెప్పారు. తన పోరాటం ప్రాంతీయ విభేదాల కోసం కాదని, తెలంగాణలో ఉంటూ ఇక్కడి చిన్న సినిమా నిర్మాతలకు అన్యాయం చేస్తున్నారని భావిస్తున్న కొందరి వ్యవహారశైలికి వ్యతిరేకంగానే మాట్లాడుతున్నానని స్పష్టం చేశారు.

చిన్న సినిమాలకు థియేటర్లు ఎందుకు ఇవ్వరు?
చిన్న సినిమాలకు అండగా ఉంటామని బహిరంగంగా ప్రకటించే కొందరు పెద్దలు, సినిమా విడుదల సమయానికి మాత్రం థియేటర్లు దక్కకుండా చేస్తున్నారని ఆయన ఆరోపించారు. హైదరాబాద్‌లో చిన్న సినిమాలకు నాలుగు లేదా ఐదు స్క్రీన్లకు మించి ఇవ్వకూడదనే విధంగా ఆంక్షలు పెట్టడం వల్ల సినిమాలు ప్రేక్షకుల వద్దకు చేరకుండానే దెబ్బతింటున్నాయని ఆవేదన వ్యక్తం చేశారు. పెద్ద స్టార్ల వెనుక ఉండి వ్యవహారాలను నడిపించే కొందరు వ్యక్తులు తెర వెనుక నుంచి చిన్న సినిమాల భవిష్యత్తును ప్రభావితం చేస్తున్నారని విమర్శించారు. ఫంక్షన్లకు వచ్చి చిన్న సినిమాలకు థియేటర్లు ఇప్పిస్తామని, వ్యాపారం చేయిస్తామని చెప్పే ప్రముఖులు వాస్తవంగా ఎంతవరకు సహకరిస్తున్నారో ప్రశ్నించాలని సూచించారు. చిన్న నిర్మాతలు సినిమా వేడుకలకు అతిథులను ఆహ్వానించే ముందు, తమ సినిమా కోసం వారు ఏం చేయగలరో స్పష్టంగా మాట్లాడుకోవాలని అన్నారు. డిస్ట్రిబ్యూటర్లకు తగిన గౌరవం ఇవ్వాలని, నిర్మాతలకు థియేటర్లు అందుబాటులోకి వచ్చేలా పంపిణీ వ్యవస్థ సహకరించాలని కోరారు.

తెలుగు సినిమాలకు ఓటీటీ తలుపులు మూసుకుపోయాయా?
చిన్న బడ్జెట్‌ తెలుగు సినిమాలకు ఓటీటీ, శాటిలైట్‌ రంగాల్లో తగిన అవకాశాలు లభించడం లేదని షిరాజ్‌ మెహదీ ప్రశ్నించారు. మలయాళం, కన్నడ, తమిళం, హిందీ సినిమాలు తెలుగులోకి అనువాదమై ఓటీటీ వేదికలపై విడుదలవుతున్నాయని, అదే సమయంలో తెలుగు చిన్న సినిమాలకు మాత్రం అవకాశాలు ఎందుకు కల్పించడం లేదని నిలదీశారు. మలయాళ చిత్ర పరిశ్రమలో చిన్న సినిమాలకు కూడా అక్కడి ఛానళ్ల ద్వారా అవకాశాలు లభిస్తున్నాయని, తెలుగు చిత్ర పరిశ్రమలోనూ అలాంటి వ్యవస్థ ఉండాలని అన్నారు. చిన్న నిర్మాతలకు ఓటీటీ, శాటిలైట్‌, ఆడియో, డబ్బింగ్‌, ఓవర్సీస్‌, థియేట్రికల్‌ హక్కుల ద్వారా వ్యాపారం చేసుకునే అవకాశాలు కల్పించాలని డిమాండ్‌ చేశారు. కేవలం ఐదు లక్షల రూపాయలతో నిర్మించిన సినిమా అయినా దానికి వ్యాపార విలువ ఉండాలని, సినిమా నిర్మాణంలో డబ్బింగ్‌, డీఐ, సంగీతం, విజువల్‌ ఎఫెక్ట్స్‌, కంప్యూటర్‌ గ్రాఫిక్స్‌, టైటిల్స్‌, సెన్సార్‌ వంటి అనేక విభాగాలకు ఖర్చు అవుతుందని గుర్తుచేశారు. ఇన్ని వ్యయాలు పెట్టిన నిర్మాతకు కనీసం పెట్టుబడి తిరిగి పొందే మార్గాలు లేకపోతే ఎలా అని ప్రశ్నించారు.

క్యూబ్‌, యూఎఫ్‌ఓ ధరలు తగ్గించాలి
చిన్న సినిమా నిర్మాతలకు ఆర్థిక భారం తగ్గించేందుకు క్యూబ్‌, యూఎఫ్‌ఓ వంటి డిజిటల్‌ సర్వీసుల ధరలను తగ్గించాలని షిరాజ్‌ డిమాండ్‌ చేశారు. పంపిణీదారులు, ఎగ్జిబిటర్లు కూడా మనుగడ సాగించేలా పరిశ్రమలో సమతుల్య వ్యవస్థ ఉండాలన్నారు. చిన్న బడ్జెట్‌ చిత్రాలకు ప్రభుత్వ సబ్సిడీలు అందించాలని, అన్ని స్థాయిల్లో వారికి వ్యాపార అవకాశాలు కల్పించాలని కోరారు. బాలీవుడ్‌లో చిన్న సినిమాలకు కూడా ఫిల్మ్‌ ఛాంబర్‌ ద్వారా ఓటీటీ, శాటిలైట్‌ సంస్థలతో అనుసంధానం చేసి అవకాశాలు కల్పిస్తున్నారని, తెలుగు పరిశ్రమలోనూ అదే తరహా పారదర్శక విధానం అవసరమని పేర్కొన్నారు. ఛాంబర్‌కు థియేటర్లు, ఓటీటీ, శాటిలైట్‌, పంపిణీ సంస్థలతో సంబంధాలు ఉన్నందున చిన్న నిర్మాతలకు పరిష్కారాలు చూపించే బాధ్యత దానిపై ఉందన్నారు.

న్యాయపోరాటం.. వంద ర్యాలీలకైనా సిద్ధం
ఈ సమస్యపై ఇప్పటికే సంబంధిత వ్యక్తులకు నోటీసులు ఇచ్చానని, కోర్టులో పిటిషన్‌ కూడా దాఖలు చేశానని షిరాజ్‌ వెల్లడించారు. న్యాయపరమైన ప్రక్రియ కొంత సమయం తీసుకుంటుందని, అయినప్పటికీ తనకు న్యాయం జరుగుతుందనే నమ్మకం ఉందన్నారు. ఇన్ని ప్రెస్‌మీట్లు నిర్వహించినా ఛాంబర్‌ నుంచి సమావేశానికి ఆహ్వానం రాలేదని, తనతో చర్చించేందుకు ఎవరూ ముందుకు రావడం లేదని ఆవేదన వ్యక్తం చేశారు. సమస్య పరిష్కారం కోసం సంబంధిత వ్యక్తులు కనీసం ఫోన్‌ చేసి మాట్లాడినా బాగుండేదన్నారు. అవసరమైతే వంద ప్రెస్‌మీట్లు, వంద ర్యాలీలు, వంద ధర్నాలు, వంద ఇంటర్వ్యూలు నిర్వహించేందుకు సిద్ధంగా ఉన్నానని ప్రకటించారు. తన పోరాటం వ్యక్తిగత ప్రయోజనం కోసం కాదని, రేపు మరో నిర్మాత, దర్శకుడు ఇలాంటి పరిస్థితిని ఎదుర్కోకూడదనే ఉద్దేశంతోనే వ్యవస్థలో మార్పు కోరుతున్నానని స్పష్టం చేశారు. ఛాంబర్‌ పాలకవర్గంలో మార్పులు రావాలని, చిన్న సినిమా నిర్మాతల సమస్యలు తెలిసినవారు నాయకత్వ బాధ్యతలు చేపట్టాలని అభిప్రాయపడ్డారు.

సీఎం రేవంత్‌రెడ్డి జోక్యం చేసుకోవాలి
తెలంగాణ ప్రభుత్వం ఈ వ్యవహారంపై దృష్టి సారించాలని, ముఖ్యమంత్రి రేవంత్‌రెడ్డి స్పందించాలని షిరాజ్‌ కోరారు. తన సమస్యను ముఖ్యమంత్రి దృష్టికి తీసుకెళ్తున్నానని, ఆయనకు ఈ వ్యవహారం గురించి తెలియజేస్తూనే ఉంటానని చెప్పారు. సినిమాటోగ్రఫీ మంత్రి కోమటిరెడ్డి వెంకట్‌రెడ్డితో పాటు ఇతర ప్రజాప్రతినిధులను కలిసి సమస్య వివరించేందుకు ప్రయత్నిస్తానని తెలిపారు. అయితే, సినిమా పరిశ్రమలోని సమస్యలపై చర్చించేందుకు ఎవరూ ముందుకు రావడం లేదని, వేడుకలు, కార్యక్రమాలకు మాత్రం సినీ ప్రముఖులు హాజరవుతున్నారని వ్యాఖ్యానించారు. తెలంగాణలో చిన్న సినిమా నిర్మాతలకు అన్యాయం జరుగుతుంటే ప్రభుత్వం బాధ్యత తీసుకోవాల్సిందేనని అన్నారు. తనకు న్యాయం జరగడంతో పాటు భవిష్యత్తులో పరిశ్రమలోకి వచ్చే ప్రతి ఒక్కరికీ సమాన అవకాశాలు కల్పించే విధంగా విధానపరమైన మార్పులు రావాలని కోరారు.

సినిమా విడుదలయ్యే వరకు మరో చిత్రం చేయను
‘ఓ అందాల రాక్షసీ’ సినిమా విషయంలో ఎదురవుతున్న సమస్యలు పరిష్కారం కాకుండా మరో చిత్రాన్ని హీరోగా, దర్శకుడిగా ప్రారంభించబోనని షిరాజ్‌ స్పష్టం చేశారు. ఒక సినిమాను ఎంతో కష్టపడి నిర్మించిన తర్వాత అది థియేటర్లలో విడుదల కాకుండా ఇంట్లో పెట్టుకోవాల్సిన పరిస్థితి వస్తే మరో సినిమా ఎలా చేయాలని ప్రశ్నించారు. ఈ సినిమా మహిళలందరికీ మంచి బహుమతిగా ఉంటుందని, దేశంలోని మహిళలకు ఒక సందేశాన్ని అందించేలా రూపొందించానని చెప్పారు. సినిమా చాలా అందంగా వచ్చిందని, నాణ్యతపై తనకు పూర్తి నమ్మకం ఉందన్నారు. సరైన సమయంలో సరైన థియేటర్లలో విడుదలైతే బ్లాక్‌బస్టర్‌ విజయం సాధించే అవకాశం ఉందని ధీమా వ్యక్తం చేశారు. తన చిత్రానికి రీ-రిలీజ్‌ అవకాశం వచ్చినా అన్ని ప్రధాన థియేటర్లలో విడుదలవుతుందనే నమ్మకం ఉందన్నారు.

చిన్న నిర్మాతలకు భరోసా కల్పించాలి
చిన్న సినిమాల నిర్మాతలు ఎవరూ భయపడవద్దని, తమ హక్కుల కోసం ధైర్యంగా మాట్లాడాలని షిరాజ్‌ పిలుపునిచ్చారు. ఫిల్మ్‌ ఛాంబర్‌ అనేది కేవలం సభ్యత్వాలు ఇచ్చే సంస్థ మాత్రమే కాదని, సినిమా నిర్మాణం నుంచి విడుదల వరకు అనేక విభాగాలతో అనుసంధానమై ఉండే కీలక వ్యవస్థ అని వివరించారు. కళాకారులు, దర్శకులు, హీరోలు, నిర్మాతలకు సరైన మార్గదర్శకత్వం, సహకారం అందిస్తే కొత్త ప్రతిభకు అవకాశాలు పెరుగుతాయని అన్నారు. పరిశ్రమలో కొందరి ఆధిపత్యం, బంధుప్రీతి తగ్గి పారదర్శకత పెరగాలని కోరారు. తెలుగు సినిమా పరిశ్రమలో చిన్న బడ్జెట్‌ చిత్రాలకు థియేటర్లు, వ్యాపార అవకాశాలు, ప్రభుత్వ ప్రోత్సాహం అందే వరకు తన పోరాటం కొనసాగుతుందని షిరాజ్‌ మెహదీ స్పష్టం చేశారు.

LEAVE A REPLY

Please enter your comment!
Please enter your name here